DESCRIPTION

Dina sabaraha kasempeten, sok aya bae santri nu tumanya, naha enya urang teu bisa sukses ? ku naon urang teu sukses dina nyanghareupan kahirupan ? Masalah sarupa kieu, sigana lain ngan saukur masalah nu karandapan ku barudak santri di madrasah. Urang oge, nu tos dewasa kasebutna, mun ceuk umur mah urang teh geus kolot kasebutna, tapi sok aya bae pertanyaan nu sarupa jeung barudak di sakola. Naha nya, urang teh bet kieu-kieu bae, asa euweuh robahna ti poe kamari ? ucapan sarupa kieu teh, lain nandakeun urang teu syukur ka Allah Swt. Estu, justru sabalikna. Pertanyaan eta teh, nyoko oge ka dawuhan Rasulullah Muhammad Saw, yen kahirupan muslim mah, poe ieu teh kudu leuwih hade ti poe kamari. Dina harti, lamun poe ayeuna, sarua-sarua keneh jeung poe-poe kamarina, pribadi urang sorangan kudu wani nanya ka diri. Ku naon bet kieu ? Masalah sarupa kieu, geuningan teu hese neangan jawabanna. Sabab, geuningan Rasulullah Muhammad Saw oge uninga, cukang lantaran gagalna hiji kahayang manusa. Lamun diantara urang aya nu nanya, kumaha cara jadi jelema pinter ? jawabanna, ‘diajar soson-soson’. Kumaha carana supaya urang bisa beunghar ? jawabanna, ‘digawe sing bener.’ Jalma nu boga karep hayang sehat, tinangtu kudu ngajaga pola kahirupan jeung kadaharan. Eta jawaban teu aya nu salah. Pon nya kitu deui, bakalan sakabeh nu maca ‘iber’, mibanda sikep nu sarua. Satuju kana eta jawaban. Tapi, sanajan kitu, naha jawaban eta teh geus pasti bakalan jadi jalma sukses ? Palebah dieu urang, tiasa ningal kana kasauran Kanjeng Rasul Muhammad Saw. Dawuhanna, sakumaha diriwayatkeun ku Muslim, r.a. “Ti Abu Hurairah, satemenna Rasulullah Muhammad Saw ngadawuh, sing saha jalma maot, sedengkeun manehna teu pernah jihad, jeung teu pernah aya kahayang pikeun jihad, eta jalma maotna dina kaayaan mawa sabagian sifat jalma munapek”. Hampura. Asbabul wurudl eta hadis aya pakuat-pakaitna jeung jihad, bajoang ngabela agama Allah. Perang kaasup salah sahijina. Tapi, dina ieu kasempetan, simkuring nginjem kana hasil panaluntikan Yusuf Qardhawi (2010:lxxxv), dina kitab Fiqh Jihad nu kacida kandelna, ngauningakeun yen harti jihad teh (diantarana), nya eta, “ngetrukkeun usaha, kamampuan jeung tanaga”. Ningal kana ieu watesan, urang bisa ngahartikeun, yen jihad the dilarapkeun di luar masalah peran atau bebela ka nagara (Islam). Di gawe keur nyiar nafkah kulawarga oge, bisa disebut jihad fi sabilillah. Kusabab eta, istilah jihad bisa dimaknaan ngetrukkeun rasa, usaha, kamampuan jeung tanaga dina ngahontal cita-cita. Aya tilu masalah, nu aya patula-patalina jeung makna ieu hadist. Kahiji, bentes pisan, yen nu disebut kasuksesan hirup teu saukur ku boga kahayang. Kesuksesan hirup, kudu dibarengan ku usaha atau jihad. Kadua, kahontal henteuna kahayang, atawa kaudag henteuna cita-cita, lain ngan saukur ku kanyaho, tapi kudu ku gawe. Loba nu nyaho, tapi teu migawe, maka kahayangna eta moal tinekanan. Nu pasti, makna tina eta hadis, lir ibarat mere iber ka urang, yen sing saha jalma nu ngan saukur nyaho cara hirup sukses, tapi teu milampah gawe nu bisa nganteurkeun kana kasuksesan, disebut jalma anu munapek. Naon sababna,”geus nyaho carana, tapi teu dipigawe..” tah eta masalah utama nu ngabalukarkeun jalma teu bisa ngudag kasuksesan. Malik deui kana masalah di luhur tadi. Jadi, ku naon urang hese ngahontal kana naon rupa nu dipikahayang ku urang ? bisa jadi, (a) urang apal kumaha carana ngahontal eta cita-cita, tapi teu migawe carana, atawa (b) urang migawe eta cara, tapi teu soson-soson atawa leungit sifat jihadna. Dina harti nu leuwih lega, bisa disebutkeun (a) munapek teh, jalma nu lampahna teu luyu jeung nu dipikanyahona, atawa (b) gawena teu soson-soson, asal jadi bae, puraga tanpa kadenda. Teu serieus. Asal kapuji ku batur wungkul. Dipigawe mah dipigawe, tapi teu serieus. Leungit ruhul jihad-na. Nu kieu oge disebutna munapek. Matak oge sok aneh, lamun aya santri madrasah di tanya, “kumaha carana supaya urang bisa jadi jalma soleh ?”, barudak reang ngajarawab. Jawabanna oge bener. “kumaha carana supaya urang bisa jadi jelema pinter di sakola?” reang oge jawabanna. Tapi naha, maranehna teu milampah naon rupa nu dipikanyahona ? sigana, jalma kitu, nu disindir ku Rasulullah Muhammad Saw bieu. Wallahu alam bi showwab.